🏹 झरी नगरपंचायतीत शिवसेना (शिंदे) पक्षाची सरशी: शिलाताई चौधरी यांची नगराध्यक्ष पदावर बिनविरोध निवड !

झरी नगरपंचायतीत शिवसेना (शिंदे) पक्षाची सरशी: शिलाताई चौधरी यांची नगराध्यक्ष पदावर बिनविरोध निवड !

झरी । दि. १५ डिसेंबर २०२५ :

झरी नगरपंचायतीच्या नगराध्यक्ष पदावर शिवसेना (शिंदे) पक्षाचा शिलाताई चौधरी यांची आज बिनविरोध निवड झाली असून, पक्ष कार्यकर्त्यां मध्ये उत्साहाचे वातावरण निर्माण झाले आहे. या निवडणुकीत कोणताही विरोधक उमेदवार नसल्याने चौधरी यांची निवड एकमताने झाली, ज्यामुळे शिवसेनेच्या स्थानिक पातळीवर मजबूती दिसून आली.

या विजयाचे खरे शिल्पकार शिवसेना तालुकाप्रमुख चंद्रकांत घुगुल व स्थानीक भाजप नेते दिनेश जयस्वाल हे असुन, यांनीच ‘भाकरी फीरवत’ तत्कालीन नगराध्यक्षा यांचा विरूद्ध अविश्वास प्रस्ताव पारीत करून घेण्यात महत्वाची भुमीका बजावली असल्याचे समजते.

निवड प्रक्रियेदरम्यान पक्षाचे जिल्हा संघटक विजय चोरडीया, विनोद मोहितकर, पायलताई तोडसाम, मनिष सुरावार, आशिष गुप्ता, बालु चेढ़े, प्रतीक गौरकार, शुभम गोरे, शम्स सिद्दीकी, सोनालीताई पुरी, प्रणीताताई बांगडे यांच्यासह इतर प्रमुख नेते, पदाधिकारी आणि कार्यकर्ते मोठ्या संख्येने उपस्थित होते. या कार्यक्रमात पक्षाच्या एकजुटीचे प्रदर्शन झाले असून, कार्यकर्त्यांनी जल्लोष करत विजय साजरा केला.

विजय चोरडीया यांनी अलीकडेच शिवसेनेत प्रवेश केल्यानंतर हा पहिला मोठा यश असल्याने पक्षात नवचैतन्य आणि उत्साहाची लहर उसळली आहे. “हा विजय पक्षाच्या वाढत्या प्रभावाचा पुरावा आहे,” असे चोरडीया यांनी सांगितले.

झरी नगरपंचायतीच्या विकासासाठी शिलाताई चौधरी यांच्या नेतृत्वात नव्या योजनांना चालना मिळेल, असा विश्वास स्थानिक नागरिक व्यक्त करत आहेत. चौधरी यांनी निवडीनंतर शहराच्या प्रगतीसाठी कटिबद्ध असल्याचे सांगितले. या विजयामुळे शिवसेना (शिंदे) पक्षाची जिल्ह्यातील पकड अधिक दृढ झाली असून, आगामी निवडणुकांसाठी हा एक सकारात्मक संकेत ठरला आहे.

▪︎झरी नगरपंचायतीच्या नगराध्यक्षपदी शिला चौधरी यांची अविरोध निवड निश्चित.. https://wanisamachar.com/2025/12/06/2393/

www.WaniSamachar.com