🌀वणीतील निर्भीड पत्रकार रवी ढुमणे यांचे आत्महत्येने निधन; शहरात व पत्रकार बांधवांमध्ये शोकाची लाट..!

वणीतील निर्भीड पत्रकारितेचा खंबीर आवाज कायमचा थांबला..

▪︎गुन्हे बीटवर सक्रिय असलेल्या रवी ढुमणे यांच्या आत्महत्येने वणी हादरली; सहकाऱ्यांमध्ये शोकाची लाट !

वणी (जि.यवतमाळ) । १५ डिसेंबर, २०२५ :

वणी शहरातील गुन्हे बातम्या आणि सामाजिक प्रश्नांवर निर्भीडपणे लेखणी चालवणारे पत्रकार रवी ढुमणे यांनी आपल्या राहत्या घरी आत्महत्या केल्याने पत्रकारिता क्षेत्रासह संपूर्ण शहरात हळहळ व्यक्त होत आहे. वयाच्या अवघ्या ५५ व्या वर्षी त्यांनी टोकाचे पाऊल उचलल्याने त्यांच्या कुटुंबीयांसह सहकारी पत्रकारांमध्ये शोककळा पसरली आहे.

▪︎गुन्हे बीटवर खंबीर आवाज

रवी ढुमणे गेल्या दहा-पंधरा वर्षांपासून वणीतील स्थानिक वृत्तपत्रे आणि डिजिटल माध्यमांसाठी सक्रिय होते. विशेषतः गुन्हेगारी, पोलीस बातम्या आणि सामाजिक अन्यायावर त्यांची लेखणी बेधडक फिरायची. शहरातील अनेक संवेदनशील प्रकरणे त्यांनी उघडकीस आणली होती. त्यांच्या बातम्यांमुळे पोलिसांवर दबाव येऊन कारवाई घडली, तर दुसरीकडे काहींना त्यांच्या निर्भीडतेची कीवही यायची. स्थानिक पत्रकार म्हणून त्यांनी वणीतील अनेक सामाजिक उपक्रमांनाही हातभार लावला होता.

काही दिवसांपासून ते वैयक्तिक आणि व्यावसायिक तणावात असल्याची कुणकुण सहकाऱ्यांना होती. मात्र, त्यांनी कोणाशीही मन मोकळे केले नव्हते. आज सोमवारी सकाळी १० वाजताचा सुमारास त्यांनी राहत्या घरी गळफास घेऊन आत्महत्या केल्याचे उघड झाले. घटनेची माहिती मिळताच वणी पोलीस ठाण्याचे अधिकारी आणि कर्मचारी घटनास्थळी दाखल झाले. त्यांचा मृतदेह शवविच्छेदनासाठी पाठवण्यात आले.

 ▪︎पत्रकार बांधवांचा शोक; श्रद्धांजलीचा ओघ

रवी ढुमणे यांच्या निधनाची बातमी समजताच वणीतील पत्रकार संघटना, सहकारी आणि राजकीय-सामाजिक क्षेत्रातील मान्यवरांनी त्यांच्या घरी गर्दी केली.

रवी ढुमणे यांच्या पश्चात पत्नी, दोन मुले आणि वृद्ध आई-वडील असा परिवार आहे. त्यांच्या अकाली जाण्याने वणीतील पत्रकारिता क्षेत्राला मोठा धक्का बसला असून, निर्भीड पत्रकारितेच्या सुरक्षेचा प्रश्न पुन्हा एकदा समोर आला आहे.

“रवी ढुमणे यांचा रुपाने निर्भीड पत्रकारितेचा एक खंबीर आवाज कायमचा थांबला. त्यांच्या जागी निर्माण झालेली पोकळी कधीच भरून निघणार नाही, त्यांना ‘टिम वणी समाचार’ कडून भावपूर्ण श्रद्धांजली”

www.WaniSamachar.com