🦾वणीमध्ये स्नायूंचा थरार ! विद्यापीठस्तरीय शरीर सौष्ठव स्पर्धेचा दिमाखदार समारोप

वणीमध्ये स्नायूंचा थरार! विद्यापीठस्तरीय शरीर सौष्ठव स्पर्धेचा दिमाखदार समारोप

वणी (जि.यवतमाळ) । ११ डिसेंबर,२०२५ :

वणी शहराला प्रथमच मिळालेल्या संत गाडगे बाबा अमरावती विद्यापीठाच्या आंतर महाविद्यालयीन शरीर सौष्ठव (मुले) स्पर्धेचा बुधवारी दिमाखदार समारोप झाला. शिक्षण प्रसारक मंडळ संचालित लोकमान्य टिळक महाविद्यालयाच्या यजमानत्वात झालेल्या या स्पर्धेत विदर्भातील पाच जिल्ह्यांतून २२ हून अधिक स्नायूयोद्धे सहभागी झाले होते. सुदृढ शरीर आणि सुदृढ मनाचा संदेश घेऊन आलेल्या या स्पर्धेला वणीकर तरुणाईने उस्फूर्त प्रतिसाद दिला.

▪︎उद्घाटनाला मान्यवरांची मांदियाळी

शिक्षण प्रसारक मंडळाचे अध्यक्ष विजय मुकेवार यांच्या अध्यक्षतेखाली विदर्भ बॉडी बिल्डिंग फिटनेस असोसिएशनचे उपाध्यक्ष अविनाश लोखंडे यांच्या हस्ते स्पर्धेचे उद्घाटन झाले. व्यासपीठावर सिनेट सदस्य डॉ. प्रशांत विघे, डॉ. विलास ठाकरे, डॉ. कल्याण मालधुरे, डॉ. उमेश राठी, डॉ. नितीन देऊळकर, प्रा. विराट घुडे, डॉ. अनुज केला, ॲड. धनंजय लोखंडे, अशोक सोनटक्के, नरेंद्र ठाकरे, ओमप्रकाश चचडा, प्राचार्य डॉ. प्रसाद खानझोडे, औषध निर्माण शास्त्र महाविद्यालयाचे प्राचार्य डॉ. सुधाकर रेड्डी आदी मान्यवर उपस्थित होते.

प्राचार्य डॉ. प्रसाद खानझोडे यांनी प्रास्ताविकात म्हटले, “आपले शरीर हे सेवा आणि कर्तृत्वाचे सर्वोत्तम साधन आहे. या स्पर्धेचा उद्देश फक्त स्नायू दाखवणे नव्हे, तर तरुणांना निरोगी जीवनशैलीकडे वळवणे हा आहे.”

▪︎“वणीत हा इतिहास घडला!” – अविनाश लोखंडे”

उद्घाटक अविनाश लोखंडे यांनी वणीतील शरीर सौष्ठवाच्या इतिहासावर प्रकाश टाकताना सांगितले, “आजवर एवढे भव्य आयोजन मी पाहिले नव्हते. क्रिकेटच्या नादात इतर खेळ विसरलो आहोत. शरीर सौष्ठव हा खरा भारतीय खेळ आहे. असे उत्सवासारखे आयोजन वारंवार व्हावे.”

अध्यक्षीय समारोपात विजय मुकेवार म्हणाले, “विदर्भाचे पुणे म्हणून ओळख असलेल्या वणीला पहिल्यांदाच विद्यापीठस्तरीय स्पर्धा मिळाली, ही अभिमानाची गोष्ट आहे.”

▪︎६ गटांत जोरदार मुकाबला

स्पर्धेत ६ वजन गटांत २२ स्पर्धकांनी भाग घेतला. परीक्षक म्हणून डॉ. विलास ठाकरे, प्रा. विराट घुडे, डॉ. अनुज केला व अविनाश लोखंडे यांनी निष्पक्ष परीक्षण केले.

प्रत्येक गटातील अव्वल तीन स्पर्धकांना पदक व प्रमाणपत्र देऊन गौरवण्यात आले. विजेते स्पर्धक आता अखिल भारतीय विद्यापीठ स्पर्धेत संत गाडगेबाबा अमरावती विद्यापीठाचे प्रतिनिधित्व करतील.

▪︎वणीकर तरुणाईचा उत्स्फूर्त प्रतिसाद

स्पर्धेला प्रेक्षक गॅलरी खचाखच भरली होती. विशेषतः तरुणांनी “वन-टू-थ्री… पोज!” असा जल्लोष करीत स्पर्धकांना प्रोत्साहन दिले. आयोजनाच्या यशस्वितेसाठी शारीरिक शिक्षण संचालक प्रा. उमेश व्यास, प्रा. विराट घुडे आणि संपूर्ण महाविद्यालयीन टीम यांचे कौतुक होत आहे.

वणीकरांनी प्रथमच अनुभवलेला हा “स्नायूंचा महोत्सव” पाहता, आता शहरात फिटनेस आणि बॉडी बिल्डिंगकडे पाहण्याचा दृष्टिकोन नक्कीच बदलेल, अशी भावना व्यक्त होत आहे.

www.WaniSamachar.com