चिखलगावात भाजपला बळ: कट्टर शिवसैनिकाचा पक्षप्रवेश !

▪︎शिवसैनिक राजूभाऊ वाघमारे यांचा माजी आमदार संजिवरेड्डी बोदकुरवार यांच्या हस्ते भाजप मधे पक्षप्रवेश !

चिखलगाव (जिल्हा यवतमाळ), दि. २ जानेवारी २०२६: वणी विधानसभा मतदारसंघातील चिखलगाव येथील कट्टर शिवसैनिक तथा बाळासाहेब ठाकरे यांच्या विचारांना मानणारे राजूभाऊ वाघमारे यांनी आज भारतीय जनता पक्षात (भाजप) औपचारिक प्रवेश केला. हा पक्षप्रवेश माजी आमदार तथा भाजपचे ज्येष्ठ नेते संजिवरेड्डी बोदकुरवार यांच्या प्रमुख उपस्थितीत आणि हस्ते पार पडला.या सोहळ्याला किसान नेते दिनकरराव पावडे व राजेंद्र साखरकर उपाध्यक्ष वणी शहर भाजपा यांची विशेष उपस्थिती होती.

राजूभाऊ वाघमारे हे चिखलगाव परिसरात शिवसेनेचे सक्रिय कार्यकर्ते म्हणून ओळखले जातात. त्यांचा भाजपातील प्रवेश स्थानिक राजकीय वर्तुळात चर्चेचा विषय ठरला आहे.

आगामी पंचायत समिती आणि जिल्हा परिषद निवडणुकीच्या पार्श्वभूमीवर हा पक्षप्रवेश भाजपसाठी महत्त्वाचा मानला जात आहे. राजूभाऊ यांच्या जनसंपर्क आणि स्थानिक पातळीवरील प्रभावामुळे भाजपला ग्रामीण भागात अधिक बळ मिळण्याची शक्यता व्यक्त केली जात आहे. चिखलगाव आणि आजूबाजूच्या गावांमध्ये भाजपची संघटनात्मक ताकद वाढण्यास याचा फायदा होईल, असे पक्षातील नेत्यांचे मत आहे.

पक्षप्रवेशानंतर बोलताना संजिवरेड्डी बोदकुरवार यांनी राजूभाऊंचे स्वागत करताना सांगितले की, “अशा कट्टर कार्यकर्त्यांचा भाजप कुटुंबात समावेश झाल्याने पक्ष आणखी बळकट होईल. पंतप्रधान नरेंद्र मोदी आणि मुख्यमंत्री देवेंद्र फडणवीस यांच्या नेतृत्वात महाराष्ट्राचा विकास गतिमान करायचा आहे, त्यात राजूभाऊंचे योगदान महत्त्वाचे ठरेल.”दिनकरराव पावडे यांनीही राजूभाऊंच्या प्रवेशाचे स्वागत करून शेतकरी आणि ग्रामीण भागाच्या विकासासाठी भाजप एकमेव पर्याय असल्याचे म्हटले.

या पक्षप्रवेशाने वणी तालुक्यातील भाजपच्या तयारीला नवे बळ मिळाले असून, आगामी स्थानिक स्वराज्य संस्थांच्या निवडणुकांमध्ये पक्षाला याचा थेट फायदा होण्याची शक्यता आहे.

www.WaniSamachar.com