🐅 बेलोरा फाट्याजवळ वाघ मृत्यू प्रकरण : अपघात की घातपात?, वन विभागाचा तपास सुरू; वन्यजीव प्रेमींच्या मनात संशयाची ढगळ !

बेलोरा फाट्याजवळ वाघ मृत्यू प्रकरण : अपघात की घातपात?, वन विभागाचा तपास सुरू; वन्यजीव प्रेमींच्या मनात संशयाची ढगळ

▪︎बेलोरा फाट्याजवळ सकाळी सापडला प्रौढ नर वाघाचा मृतदेह; उत्तरिय तपासणी अहवालाची प्रतीक्षा, परिसरात भीतीचे सावट.

वणी । दि. २० डिसेंबर २०२५ :

वणी तालुक्यातील घुग्गुस-वणी मार्गावर बेलोरा फाट्याजवळ आज सकाळी एका प्रौढ पट्टेदार वाघाचा मृतदेह आढळून आल्याने परिसरात एकच खळबळ उडाली. रस्त्याच्या कडेला पडलेला हा वाघ सुमारे ८-१० वर्षांचा नर असल्याचा प्राथमिक अंदाज आहे. वन विभाग आणि पोलिसांनी घटनास्थळ गाठून मृतदेह ताब्यात घेतला असून, उत्तरिय तपासणीसाठी तो पाठवण्यात आला आहे. अपघात की विषारी अन्नाचा वापर, याबाबत अद्याप स्पष्टता नाही.

सकाळी जवळपास ७ वाजता काही प्रवाशांनी रस्त्याकडे वाघ पडलेला पाहिला आणि लगेच वन विभागाला सूचना दिली. बातमी पसरताच परिसरात नागरिकांची गर्दी उसळली. वन विभागाच्या पथकाने घटनास्थळी पोहोचून मृतदेहाची तपासणी केली. शरीरावर बाह्य़ जखमांचे स्पष्ट चिन्ह नसल्याने रात्रीच्या वेळी वाहनाची धडक बसून अपघात झाल्याची शक्यता व्यक्त होत आहे. मात्र, काहींनी विषप्रयोगाचीही शक्यता वर्तवली आहे, कारण परिसरात मानव-वन्यजीव संघर्षाच्या घटना वाढल्या आहेत.

वन विभागाच्या अधिकाऱ्यांनी सांगितले की, या भागात टिपेश्वर अभयारण्य आणि आसपासच्या जंगलात वाघांची संख्या चांगली आहे. रात्री वाघ शिकारीसाठी किंवा पाणी शोधत रस्ता ओलांडतात, तेव्हा वेगवान वाहनांची धडक बसण्याचे प्रकार घडतात. मृतदेह उत्तरिय तपासणीसाठी यवतमाळ किंवा नागपूरला पाठवला जाणार असून, पोटातील अन्न, रक्त आणि अवयवांच्या तपासणीतून मृत्यूचे नेमके कारण समोर येईल.

घटनेच्या ठिकाणी सीसीटीव्ही कॅमेरे नसल्याने वाहनाची ओळख पटवणे कठीण आहे. पोलिसांनी अपघाताची नोंद केली असून, रात्रीच्या वाहनचालकांची चौकशी सुरू आहे. स्थानिक नागरिकांनी रात्रीच्या वेळी रोडवर सावधगिरी बाळगण्याचे आणि स्पीड मर्यादा पाळण्याचे आवाहन केले आहे.

वणीत गेल्या काही महिन्यांत वाघ दिसण्याच्या घटना वाढल्या असून, यापूर्वीही अपघात झाले होते. वन्यजीव संरक्षण कार्यकर्त्यांनी या घटनेचा निषेध करताना रोडवर वाघांसाठी स्पीड ब्रेकर, चेतावनी फलक आणि अंडरपासची मागणी केली आहे. वन विभागाने परिसरात गस्त वाढवली असून, नागरिकांना सतर्क राहण्याचा सल्ला दिला आहे.

हा मृत्यू अपघात असो की घातपात, वन्यजीवांच्या संरक्षणासाठी अधिक सजगता आवश्यक असल्याचे मत व्यक्त होत आहे. उत्तरिय अहवाल येताच खरे कारण समोर येईल, तोपर्यंत परिसरात भीतीचे वातावरण कायम आहे.

www.WaniSamachar.com