वणी शहराला पाणीटंचाई मुक्त करण्याच्या दिशेने ठोस पाऊल !

▪︎“अमृत २.०” योजनेच्या कामांची मा. आ. संजीवरेड्डी बोदकुरवार यांची सखोल पाहणी !

वणी (यवतमाळ) । १९ जानेवारी २०२६ :

वणी शहरातील दीर्घकाळ चाललेल्या पाणीटंचाईच्या समस्येवर कायमस्वरूपी तोडगा काढण्यासाठी अमृत २.० (अटल मिशन फॉर रिजुव्हनेशन अँड अर्बन ट्रान्सफॉर्मेशन) योजनेअंतर्गत सुरू असलेल्या महत्त्वाकांक्षी पाणीपुरवठा प्रकल्पाच्या कामांची प्रत्यक्ष पाहणी माजी आमदार तथा भाजप नेते संजीवरेड्डी बोदकुरवार यांनी केली. ही योजना त्यांच्या आमदारकीच्या काळात मंजूर झाली असून, त्यांनीच या प्रकल्पासाठी आवश्यक निधी मंजूर करून घेतला होता. आज हा प्रकल्प प्रत्यक्ष अंमलबजावणीच्या टप्प्यात पोहोचला असून, वणीच्या नागरिकांना शाश्वत, शुद्ध आणि पुरेसा पाणीपुरवठा मिळण्याच्या दिशेने हे मोठे पाऊल ठरत आहे.

रांगणा भुरकी (ता. वणी) येथे वर्धा नदीतून वणी शहरासाठी टाकण्यात येत असलेल्या मुख्य जलवाहिनीच्या कामाची सखोल तपासणी माजी आमदार बोदकुरवार यांनी केली. यावेळी नवनिर्वाचित वणी नगराध्यक्षा विद्याताई आत्राम, नगरपरिषद उपाध्यक्ष व पाणीपुरवठा सभापती राकेश बुग्गेवार, आरोग्य सभापती अनिल चिंडालिया, मुख्याधिकारी सचिन गोडे आणि संबंधित अधिकारी उपस्थित होते.

● या योजनेमुळे वणी शहर कसा होईल पाणीटंचाईमुक्त?

• विश्वासार्ह जलस्रोत : नवरगाव धरणातून थेट स्वतंत्र मुख्य जलवाहिनीमार्फत नियमित आणि पुरेसा पाणीपुरवठा सुनिश्चित होईल.
• आधुनिक जलशुद्धीकरण संयंत्र : नागरिकांना शुद्ध, सुरक्षित आणि आरोग्यदायी पाणी मिळेल.
• नवीन पाण्याच्या टाक्या व वाढीव साठवण क्षमता : पाणीपुरवठ्यात स्थिरता येईल आणि प्रत्येक भागात समान दाबाने पाणी मिळेल.
• उन्हाळ्यातील टंचाई संपुष्टात : टँकरवरील अवलंबित्व पूर्णपणे समाप्त होईल; नियमित पुरवठा होईल.
• भविष्यातील गरजा पूर्ण : शहराच्या वाढत्या लोकसंख्येच्या आणि विकासाच्या गरजा लक्षात घेऊन शाश्वत व्यवस्था उभी राहील.

माजी आमदार संजीवरेड्डी बोदकुरवार म्हणाले, “वणी शहराच्या पाणीप्रश्नावर कायमस्वरूपी उपाय म्हणून ही योजना माझ्या आमदारकीत मंजूर केली. आज तिची प्रत्यक्ष अंमलबजावणी पाहून आनंद होत आहे. जलशुद्धीकरण संयंत्र, पाण्याच्या टाक्या आणि संपूर्ण यंत्रणा लवकरात लवकर पूर्ण करून शहराला पाणीटंचाईमुक्त करण्याचा आमचा ठाम संकल्प आहे. विकासाच्या कामात सातत्य, पारदर्शकता आणि परिणामकारक अंमलबजावणी हाच आमचा ध्यास राहील.”

या पाहणीदरम्यान प्रकल्पातील प्रगती, तांत्रिक बाबी आणि अंमलबजावणीची गुणवत्ता यांची सखोल चर्चा झाली. स्थानिक नागरिकांनी या योजनेसाठी माजी आमदारांचे आभार मानले असून, लवकरच शहरात पाण्याची टंचाई संपुष्टात येईल, अशी अपेक्षा व्यक्त केली जात आहे.

वणी शहराच्या भविष्यासाठी ही योजना एक मैलाचा दगड ठरणार असून, विकासाच्या दृष्टिकोनातून हे एक महत्त्वाचे पाऊल आहे.

 आपले लेख, बातमी व जाहिराती  प्रसिद्ध करण्या करीता संपर्क करा : 9021203010.

---

www.WaniSamachar.com