विद्यार्थ्यांच्या उत्साहाने गाजला नगरपरिषदेचा आंतरशालेय क्रीडा व कला महोत्सव !
वणी । १९ जानेवारी २०२६ :
यवतमाळ जिल्ह्यातील वणी नगरपरिषदेच्या शाळांमध्ये खेळ, कला आणि उत्साहाचा उत्सव साजरा झाला. नगर परिषद अंतर्गत आयोजित आंतरशालेय क्रीडा व कला महोत्सव हा कार्यक्रम राष्ट्रसंत तुकडोजी महाराज नगरपरिषद उच्च प्राथमिक शाळा क्रमांक ७ च्या मैदानावर मोठ्या उत्साहात आणि यशस्वीरित्या पार पडला. हा महोत्सव विद्यार्थ्यांच्या ऊर्जा, कौशल्य आणि सांस्कृतिक प्रतिभेचे दर्शन घडवणारा ठरला.
महोत्सवाचे उद्घाटन नगरपरिषद अध्यक्षा विद्याताई आत्राम यांच्या हस्ते पार पडले. कार्यक्रमाला अध्यक्षस्थानी उपविभागीय अधिकारी नितीन कुमार हिंगोली उपस्थित होते. प्रमुख अतिथी म्हणून मुख्याधिकारी सचिन गाडे, उपमुख्याधिकारी जयंत सोनटक्के, प्रशासन अधिकारी गजानन कासावार, नगरसेविका पुजाताई रामगीरवार, मनोज सिडाम आणि धनराज भोंगळे यांच्यासह मान्यवर उपस्थित होते.
कार्यक्रमाच्या सुरुवातीला सर्व शाळांच्या विद्यार्थ्यांनी अतिथींना मानवंदना देत उत्साहपूर्ण स्वागत केले. वैयक्तिक स्पर्धांमध्ये ७५ मीटर दौड, १०० मीटर दौड, लांब उडी यांसारख्या अॅथलेटिक्स स्पर्धा रंगतदार झाल्या. सांघिक खेळांमध्ये कबड्डी, खो-खो आणि लंगडी या पारंपरिक खेळांमध्ये विद्यार्थ्यांनी अप्रतिम कौशल्य दाखवले. याशिवाय सांस्कृतिक कार्यक्रमात विविध शाळांच्या विद्यार्थ्यांनी नृत्य सादरीकरण करून प्रेक्षकांना मंत्रमुग्ध केले. विशेष म्हणजे, पालकांच्या सांस्कृतिक कार्यक्रमात पालकांनी मोठ्या प्रमाणात सहभाग घेत कार्यक्रमाला अधिकच रंगत आणली.
बक्षीस वितरण समारंभात नगराध्यक्षा विद्याताई आत्राम यांनी बक्षिसे वितरित केली. अध्यक्ष म्हणून मुख्याधिकारी सचिन गाडे यांनी विद्यार्थ्यांना प्रेरणादायी मार्गदर्शन केले. त्यांनी खेळ, कला आणि शिक्षण यांचा समतोल साधण्याचे महत्त्व अधोरेखित केले.
सर्वसाधारण विजेतेपद प्राथमिक गटात नगर परिषद शाळा क्रमांक ७ ने पटकावले. उपविजेतेपद शाळा क्रमांक १ आणि शाळा क्रमांक २ यांना संयुक्तपणे मिळाले. उच्च प्राथमिक गटात विजेतेपद नगर परिषद उच्च प्राथमिक शाळा क्रमांक ४ ने मिळवले, तर उपविजेतेपद आयोजक शाळा क्रमांक ८ च्या विद्यार्थ्यांनी मिळवले.
महोत्सवाच्या यशस्वी आयोजनाबद्दल नगराध्यक्षा विद्याताई आत्राम आणि मुख्याधिकारी सचिन गाडे यांनी प्रशासन अधिकारी, केंद्र समन्वयक तसेच सर्व शाळांच्या मुख्याध्यापक आणि शिक्षकांचे मनापासून कौतुक केले. त्यांनी भविष्यात अशा कार्यक्रमांना अधिक प्रोत्साहन देण्याचे आश्वासन दिले.
हा क्रीडा व कला महोत्सव केवळ स्पर्धाच नव्हे, तर विद्यार्थ्यांमधील एकता, आत्मविश्वास आणि सांस्कृतिक वारसा जपण्याचा सुंदर प्रयत्न ठरला. वणीतील शाळकरी मुले आणि पालकांच्या उत्साहाने शहरात सकारात्मक ऊर्जा निर्माण झाली आहे !.
आपले लेख, बातम्या, जाहिरात प्रसिद्ध करण्याकरीता संपर्क करा, 9021203010
www.WaniSamachar.com
