वणीत शेतकऱ्यांचा महाएल्गार मेळावा; बच्चू कडूंचा सरकारला इशारा !

वणी । दि. ४ जानेवारी २०२६:

वणी शहरातील शासकीय मैदानावर दुपारी आयोजित करण्यात आलेल्या महाएल्गार शेतकरी मेळाव्याने हजारो शेतकरी, शेतमजूर आणि ग्रामीण भागातील नागरिकांनी हजेरी लावली. हा मेळावा शेतकरी संघटनांच्या वतीने आयोजित करण्यात आला होता आणि त्यात माजी मंत्री बच्चू कडू यांनी सरकारवर जोरदार टीका करताना शेतकऱ्यांना संघर्षासाठी सज्ज राहण्याचे आवाहन केले.मेळाव्यात अध्यक्षीय भाषण करताना बच्चू कडू म्हणाले, की शेतकऱ्यांना पेरणीपासून ते काढणीपर्यंत सतत लुटले जात आहे. उपासमारीने मरण्यापेक्षा लढाई उभी करणे चांगले, असे सांगत त्यांनी शेतकऱ्यांना एकजुटीचे आवाहन केले. जात, धर्म आणि पक्ष विसरून सर्वांनी एकत्र येण्याची गरज असल्याचे त्यांनी नमूद केले. तसेच, पूर्ण अपंगांना पेन्शन न देणाऱ्या सरकारचीही त्यांनी कठोर शब्दांत समीक्षा केली.

कडू यांनी शेतकरी कर्जमाफीच्या मुद्द्यावर सरकारला थेट इशारा दिला. ३० जून २०२६ पर्यंत कर्जमाफी जाहीर न झाल्यास १ जुलैपासून राज्यात एकही रेल्वे गाडी चालू देणार नाही, अशी घोषणा त्यांनी केली. यासह, वन्यजीव समस्या आणि हमीभावासाठी राष्ट्रीय महामार्ग रोको आंदोलन आणि रामटेक ते ताडोबा पदयात्रेचीही तयारी जाहीर करण्यात आली.

मेळाव्यात ज्येष्ठ शेतकरी नेते ॲड. वामनराव चटप, विजय निवल, देवराव धांडे, दशरथ पाटील, अनिल हेपट, सतीश देरकर, दीपक चटप, मोबिन शेख, राजु भोंगळे, रघुवीर कारेकर यांच्यासह अनेक मान्यवरांनी मार्गदर्शन केले. कार्यक्रमाचे सूत्रसंचालन संदीप गोहोकर यांनी केले, तर आभार मोबिन शेख यांनी मानले.

शेतकरी संघटनांच्या प्रयत्नांमुळे हा मेळावा यशस्वी झाला असून, शेतकऱ्यांच्या हक्कांसाठीचा संघर्ष आता अधिक तीव्र होणार असल्याचे चित्र निर्माण झाले आहे.

www.WaniSamachar.com