माजी आमदार विश्वास नांदेकर यांचे मुंबईत निधन; वणी विधानसभा क्षेत्रात शोककळा

▪︎दीर्घ आजाराने लिलावती रुग्णालयात अखेरचा श्वास; राजकीय व सामाजिक क्षेत्रात अपूरणीय पोकळी.

वणी/मुंबई, दि. २२ डिसेंबर २०२५ :

यवतमाळ जिल्ह्यातील वणी विधानसभा मतदारसंघाचे माजी आमदार तथा शिवसेना नेते विश्वास रामचंद्र नांदेकर (विश्वासभाऊ) यांचे २१ डिसेंबर रविवारी रात्री मुंबईतील लिलावती रुग्णालयात निधन झाले. ते गेल्या काही महिन्यांपासून आजारी होते आणि उपचार घेत होते. रात्री अकरा वाजून पाच मिनिटांनी त्यांनी अखेरचा श्वास घेतला. त्यांच्या निधनाची बातमी पसरताच वणी तालुका आणि संपूर्ण विधानसभा क्षेत्रात शोकाची लाट उसळली.

विश्वासभाऊ नांदेकर यांचा राजकीय प्रवास जिल्हा परिषद सदस्यापासून सुरू झाला होता. २००४ ते २००९ या काळात ते वणीचे आमदार म्हणून निवडून आले होते. शिवसेनेचे यवतमाळ जिल्हा प्रमुख म्हणूनही त्यांनी काम केले. संघटनेवर मजबूत पकड, प्रशासनावर वचक आणि जनतेच्या प्रश्नांसाठी सदैव झटणारी नेतृत्वशैली यामुळे ते लोकप्रिय होते. सामाजिक मुद्द्यांवर ठाम भूमिका घेणारे आणि कार्यकर्त्यांशी जवळीक सांभाळणारे नेते म्हणून त्यांची ओळख होती. दीर्घ आजाराने त्यांना गेल्या काही महिन्यांत त्रास सहन करावा लागला होता. दोन महिन्यांपूर्वी गुडघ्याची शस्त्रक्रिया झाली होती आणि गेल्या महिन्याभरापासून मुंबईत उपचार सुरू होते.

उपमुख्यमंत्री एकनाथ शिंदे यांनीही रुग्णालयात भेट देऊन त्यांची तब्येत जाणून घेतली होती. त्यांच्या निधनाने राजकीय क्षेत्रात मोठी पोकळी निर्माण झाली आहे. वणी विधानसभा क्षेत्रातील विकासकामे आणि सामाजिक संघर्षांमध्ये त्यांचा मोठा वाटा होता. त्यांच्या जाण्याने कार्यकर्ते आणि समर्थकांना धक्का बसला आहे.

त्यांचे पार्थिव मुंबईहून वणीला आणले जाणार असून, अंत्यसंस्कार आणि दर्शनाची व्यवस्था लवकरच जाहीर होईल. विविध राजकीय नेते, सामाजिक संघटना आणि नागरिकांनी त्यांना श्रद्धांजली वाहिली आहे. ईश्वर त्यांच्या आत्म्यास शांती देवो आणि कुटुंबीयांना व समर्थकांना या दुःखातून सावरायची शक्ती देवो, अशी भावना व्यक्त होत आहे.

विश्वासभाऊ नांदेकर यांचा वारसा आणि कार्य नेहमी स्मरणात राहील. वणीकरांसह संपूर्ण जिल्ह्यात शोक व्यक्त केला जात आहे.

Team WaniSamachar.Com कडून त्यांचा स्मृतिस भावपूर्ण श्रद्धासुमन !

🙏💐🙏💐🙏

www.WaniSamachar.com