‘मसल्सचा महासंग्राम’ 

लोकमान्य टिळक महाविद्यालया कडून आंतर महाविद्यालयीन बॉडी बिल्डिंग स्पर्धेचे धुमधडाक्यात आयोजन

▪︎संत गाडगे बाबा अमरावती विद्यापीठाची आंतर महाविद्यालयीन बॉडी बिल्डिंग स्पर्धा वणीत.

▪︎रामदास तडस यांच्या उपस्थितीत १० डिसेंबरला भव्य शुभारंभ.

वणी (जि.यवतमाळ) । ०८ डिसेंबर,२०२५ :

संत गाडगे बाबा अमरावती विद्यापीठाच्या आंतर महाविद्यालयीन शरीर सौष्ठव (मुले) स्पर्धेचे यजमानपद वणीतील लोकमान्य टिळक महाविद्यालयाने स्वीकारले असून, बुधवार, १० डिसेंबर २०२५ रोजी सायंकाळी ५ वाजता शिक्षण प्रसारक मंडळाच्या खुल्या रंगमंचावर या स्पर्धेचा शुभारंभ होणार आहे.

वणी शहरात प्रथमच आयोजित होत असलेल्या या स्पर्धेमुळे क्रीडाविषयक उत्साह वाढला असून, विद्यार्थ्यांसह स्थानिक नागरिकांच्या सहभागाची अपेक्षा आहे.

▪︎स्पर्धेची वैशिष्ट्ये आणि सहभागी

स्पर्धेत ६० किलोपेक्षा कमी, ६० ते ६५, ६५ ते ७०, ७० ते ७५, ७५ ते ८०, ८० ते ८५, ८५ ते ९० आणि ९० किलोपेक्षा अधिक अशा एकूण आठ वजन गटांचा समावेश आहे. संत गाडगे बाबा अमरावती विद्यापीठाशी संलग्न विदर्भातील पाचही जिल्ह्यांतील विविध महाविद्यालयांतून निवडलेले ५० हून अधिक स्पर्धक सहभागी होत आहेत. ही स्पर्धा केवळ शारीरिक सौंदर्यावर आधारित नसून, अनुशासन, मेहनत आणि फिटनेसची प्रेरणा देणारी असल्याचे आयोजकांनी सांगितले.

स्पर्धेचे उद्घाटन महाराष्ट्र राज्य कुस्तीगीर संघटनेतील अध्यक्ष रामदासजी तडस यांच्या हस्ते होईल, तर अध्यक्षस्थानी शिक्षण प्रसारक मंडळाचे अध्यक्ष विजयराव मुकेवार राहतील. प्रमुख पाहुणे म्हणून विदर्भ उपाध्यक्ष अविनाश लोखंडे (बॉडी बिल्डिंग फिटनेस असो.), प्राचार्य डॉ. सुभाष गावंडे (सिनेट सदस्य), प्रा.डॉ. प्रशांत विघे (सिनेट सदस्य), तालुका क्रीडा अधिकारी शिल्पा कोकाटे आणि बाबासाहेब परवेकर महाविद्यालयाचे प्राचार्य डॉ. धर्मेंद्र तेलगोटे उपस्थित राहणार आहेत.

▪︎आयोजकांचे प्रयत्न आणि अपेक्षा

शिक्षण प्रसारक मंडळाचे उपाध्यक्ष नरेंद्रजी बरडिया, सचिव सुभाषराव देशमुख, सहसचिव अशोकराव सोनटक्के तसेच सदस्य उमापती कुचनकर, ओमप्रकाश चचडा, अनिल जयस्वाल, नरेंद्र ठाकरे, विनायक तत्त्वादी, नरेश मुणोत आणि विश्वास नांदेकर यांच्या मार्गदर्शनाखाली स्पर्धेची तयारी पूर्ण झाली आहे. महाविद्यालयाचे प्राचार्य डॉ. प्रसाद खानझोडे आणि शारीरिक शिक्षण व क्रीडा संचालक प्रा. उमेश व्यास यांनी सांगितले की, “ही स्पर्धा वणीतील युवकांना फिटनेसबाबत जागरूक करण्यासाठी महत्त्वपूर्ण ठरेल.”

वणीतील ही स्पर्धा केवळ क्रीडांगणावर मर्यादित न राहता, सामाजिक जागरूकतेचा भाग म्हणून राबवली जात असल्याने स्थानिक व्यावसायिक, विद्यार्थी आणि क्रीडाप्रेमींनी मोठ्या संख्येने उपस्थित राहण्याचे आवाहन आयोजकांनी केले आहे. यामुळे वणीचा क्रीडा वातावरण अधिक समृद्ध होईल, असा विश्वास व्यक्त करण्यात आला.

www.WaniSamachar.com