📖 वणीतील ऐतिहासिक नगर वाचनालयाला नवे नेतृत्व; माजी आमदार बोदकुरवार अध्यक्षपदी

वणीतील ऐतिहासिक नगर वाचनालयाला नवे नेतृत्व; माजी आमदार बोदकुरवार अध्यक्षपदी

वणी । दि.०७ डिसेंबर, २०२५ :

१५० वर्षांच्या समृद्ध वारशाला उजाळा देणाऱ्या वणीतील नगर वाचनालयाच्या अध्यक्षपदी माजी आमदार संजीवरेड्डी बोदकुरवार यांची एकमताने निवड झाली असून, साहित्य व शिक्षण क्षेत्रातील या महत्त्वाच्या संस्थेला नव्या ऊर्जेची चालना मिळाली आहे. माजी अध्यक्ष माधवराव सरपटवार यांच्या निधनानंतर रिकामी झालेल्या या पदासाठी आज (७ डिसेंबर २०२५) संचालक मंडळाच्या बैठकीत बोदकुरवार यांची सर्वानुमते निवड करण्यात आली.

१८७४ मध्ये ब्रिटिश काळात स्थापन झालेल्या या ‘अ’ वर्ग वाचनालयाने वणी व परिसरातील वाचनसंस्कृतीला खंबीर आधार दिला आहे. सध्या येथे २७ हजारांहून अधिक ग्रंथसंपदा असून, महाराष्ट्रातील प्रमुख वृत्तपत्रे व मासिके वाचकांसाठी उपलब्ध आहेत.

दरवर्षी ४० हून अधिक दिवाळी अंक फक्त ३०० रुपयांच्या वार्षिक शुल्कात वर्षभर उपलब्ध होतात. विशेषतः स्पर्धा परीक्षेच्या तयारी करणाऱ्या विद्यार्थ्यांसाठी ३० रुपयांच्या मासिक वर्गणीत संपूर्ण अभ्याससामग्री मिळते. अभ्यासिका दैनंदिन ४० ते ५० विद्यार्थ्यांनी गजबजलेली असते, जे या संस्थेची लोकप्रियता दर्शवते.

वाचनालयामार्फत नवोदित लेखक व मान्यवर वक्त्यांना व्यासपीठ देण्याचे सातत्यपूर्ण कार्य सुरू असून, विविध साहित्यिक उपक्रम राबविले जातात. या संस्थेच्या विकासात प्राचार्य राम शेवाळकर, स्वातंत्र्यवीर नानाजी भागवत, रतनलाल जयस्वाल, डॉ. दिनकर मंगदे व माजी अध्यक्ष माधवराव सरपटवार यांचे अमूल्य योगदान आहे. त्यांच्या प्रयत्नांमुळे वाचनालयाने आज सार्धशताबदीकडे वाटचाल सुरू केली आहे.

बोदकुरवार यांनी आजच पदभार स्वीकारले असून, पदग्रहण सोहळ्यात उपाध्यक्ष विशाल झाडे, सचिव गजानन कासावार, संचालक हरिहर भागवत, प्राची पाथ्रडकर व कर्मचारी मंडळ उपस्थित होते.

बोदकुरवार म्हणाले, “वाचन हीच खरी संपत्ती. मी नगर वाचनालयाच्या विस्तारासाठी नवीन उपक्रम राबवीन आणि युवा वाचकांना प्रोत्साहन देईन.”

या निवडीमुळे वणीतील साहित्यप्रेमी व विद्यार्थी वर्गात उत्साह निर्माण झाला असून, संस्थेच्या भविष्यातील यशाबाबत अपेक्षा वाढल्या आहेत.

www.WaniSamachar.com