📍शिरपूर-शिंदोला फाटा रस्त्यावर मोहदा खाणीतील ओवरलोड ट्रकमधून मोठे दगड कोसळल्याने अपघाताचा धोका.. रस्त्यावर अक्षरश: मोठ्या दगडांचा सड़ा.

शिरपूर-शिंदोला फाटा रस्त्यावर मोहदा खाणीतील ओवरलोड ट्रकमधून मोठे दगड कोसळल्याने अपघाताचा धोका, रस्त्यावर अक्षरश: मोठ्या दगडांचा सड़ा.

शिरपूर । ता. ५ डिसेंबर :

शिरपूर ते शिंदोला फाटा या रस्त्यावर मोहदा माइनिंगमधून येणाऱ्या ओवरलोड ट्रकमधून मोठमोठे दगड रस्त्यावर कोसळत असल्याने गेल्या दोन दिवसांपासून या मार्गावरून ये-जा करणाऱ्या वाहनचालकांसमोर जिवघेणा धोका निर्माण झाला आहे. विशेषतः दुचाकीस्वारांसाठी हा रस्ता अत्यंत जीवघेणा बनला असून, कधीही मोठा अपघात होण्याची शक्यता व्यक्त केली जात आहे.

स्थानिक नागरिकांनी सांगितले की, ओवरलोड ट्रकमधून पडलेले हे मोठे दगड रस्त्याच्या मधोमध आणि कडेला विखुरलेले असल्याने वाहने थांबवणे किंवा वळसा घालणेही कठीण झाले आहे. रात्रीच्या वेळी हे दगड दिसणेही अवघड असल्याने अपघाताची शक्यता आणखी वाढते.

या गंभीर बाबतची माहिती काही जागरूक नागरिकांनी तात्काळ ११२ या आपत्कालीन क्रमांकावर कॉल करून पोलिसांना दिली. मात्र, आज दुपारपर्यंत या ठिकाणी कोणतीही स्वच्छता किंवा दगड हटवण्याची कार्यवाही झालेली नाही, असे नागरिकांनी सांगितले.

स्थानिक रहिवाशांनी प्रशासनाकडे जोरदार मागणी केली आहे की, एखादी मोठी दुर्घटना घडण्यापूर्वीच संबंधित खाण मालक, वाहतूक विभाग आणि पोलिसांनी एकत्रितपणे तात्काळ उपाययोजना कराव्यात. तसेच ओवरलोड वाहनांवर कडक कारवाई करावी, जेणेकरून भविष्यात अशा घटना घडणार नाहीत.

हा रस्ता शिरपूर तालुक्यातील महत्त्वाचा जीवनवाहिनी समजला जातो. त्यामुळे प्रशासनाने याकडे त्वरित लक्ष देऊन नागरिकांच्या जीविताची सुरक्षा करावी, अशी अपेक्षा व्यक्त होत आहे.

www.WaniSamachar.com