खरीप हंगामासाठी प्रशासन सज्ज!

खत-बियाण्यांचा काळाबाजार केल्यास खैर नाही; पालकमंत्री संजय राठोड यांचा कडक इशारा

यवतमाळ जिल्हा | ०७ मे २०२६ :

जिल्ह्यात खरीप हंगामाची चाहूल लागली असून बळीराजा पुन्हा एकदा शेतीच्या कामात गुंतला आहे. या पार्श्वभूमीवर शेतकऱ्यांना कोणत्याही प्रकारची अडचण येऊ नये, यासाठी जिल्हा प्रशासन आणि कृषी विभागाने सूक्ष्म नियोजन करावे, असे स्पष्ट निर्देश राज्याचे मृद व जलसंधारण मंत्री तथा यवतमाळ जिल्ह्याचे पालकमंत्री ना. संजय राठोड यांनी दिले आहेत. जिल्हाधिकारी कार्यालयात आयोजित ‘जिल्हास्तरीय खरीप हंगामपूर्व नियोजन’ आढावा बैठकीत ते बोलत होते.

यावेळी बैठकीला खा. प्रतिभा धानोरकर, आ. बाळासाहेब मांगुळकर, आ. राजू तोडसाम, आ. किसन वानखेडे, आ. संजय देरकर, जिल्हाधिकारी विकास मीना यांच्यासह विविध विभागाचे वरिष्ठ अधिकारी उपस्थित होते.

■ ठळक मुद्दे: पालकमंत्र्यांच्या प्रमुख सूचना

• कर्ज वाटप व पुरवठा: शेतकऱ्यांना तातडीने पीक कर्जाचे वाटप पूर्ण करावे. दर्जेदार खते, बियाणे आणि औषधांचा तुटवडा भासणार नाही याची खबरदारी घ्यावी.

• काळाबाजारावर ‘सर्जिकल स्ट्राईक’: खत आणि बियाण्यांची साठेबाजी किंवा काळाबाजार करणाऱ्या विक्रेत्यांवर कडक कारवाई करण्याचे आदेश त्यांनी दिले.

• शेतकरी मदत केंद्र: शेतकऱ्यांच्या तक्रारी निवारण्यासाठी ‘टोल फ्री’ क्रमांक २४ तास कार्यरत ठेवण्याच्या सूचना देण्यात आल्या.

• शेतीपूरक व्यवसाय: केवळ पारंपरिक शेतीवर अवलंबून न राहता फळबाग आणि भाजीपाला लागवडीचे उद्दिष्ट पूर्ण करावे.

■ ६ लाख १६ हजार हेक्टरवर खरीपाचा पेरा!

जिल्ह्यात यंदा ६ लाख १६ हजार हेक्टर क्षेत्रावर खरीप पिकांचे नियोजन करण्यात आले आहे. याचे सविस्तर गणित खालीलप्रमाणे आहे:

खत साठा: जिल्ह्याला २ लाख ७२ हजार मेट्रिक टन रासायनिक खतांची गरज आहे. सध्या १ लाख २९ हजार मे. टन साठा उपलब्ध असून विक्रेत्यांकडेही पुरेसा साठा असल्याची माहिती जिल्हा अधिक्षक कृषी अधिकारी मनोजकुमार ढगे यांनी दिली.

■ पीक विम्यासाठी मुख्यमंत्र्यांकडे धाव!

जिल्ह्यातील शेतकऱ्यांना पीक विमा मिळण्यात येणाऱ्या तांत्रिक अडचणी आणि भरपाईमधील त्रुटी दूर करण्यासाठी पालकमंत्री ना. संजय राठोड यांच्या नेतृत्वात लोकप्रतिनिधींचे एक शिष्टमंडळ पुढील आठवड्यात मुख्यमंत्री देवेंद्र फडणवीस आणि कृषीमंत्री दत्ता भरणे यांची भेट घेणार आहे. या बैठकीत जिल्ह्यातील विम्याच्या प्रश्नावर कायमस्वरूपी तोडगा काढण्याचा निर्धार करण्यात आला आहे.

■ प्रशासनाचा ‘वॉच’: भरारी पथके तैनात

बोगस बियाणे आणि खतांची विक्री रोखण्यासाठी कृषी विभागाने कंबर कसली आहे.

1. ३६ गुणनियंत्रण निरीक्षक मैदानात उतरले आहेत.

2. जिल्हास्तरावर विशेष भरारी पथक आणि तालुकानिस्तरावर ३२ नियंत्रण कक्ष स्थापन झाले आहेत.

3. कापूस तक्रार निवारण आणि जैवतंत्रज्ञान समित्यांद्वारे प्रत्येक हालचालीवर लक्ष ठेवले जाणार आहे.

■ इतर महत्त्वाचे निर्णय:

• जलयुक्त शिवार २.०: मंजूर असलेली १४३१ कामे जून महिना संपण्यापूर्वी पूर्ण करण्याचे निर्देश.

• वीज पुरवठा: खरीप हंगामात शेतकऱ्यांचा वीज पुरवठा खंडित होणार नाही, याची दक्षता घेण्यास महावितरणला सांगण्यात आले आहे.

• हवामान अंदाज: कृषी विज्ञान केंद्राचे दीपक कच्छवे यांनी ‘एल निनो’चा प्रभाव आणि पावसाच्या अंदाजाबाबत माहिती दिली.

■ श्रद्धांजली:

बैठकीच्या प्रारंभी, अलीकडेच वीज पडून मृत्यूमुखी पडलेल्या शेतकऱ्यांना मौन बाळगून श्रद्धांजली अर्पण करण्यात आली.