🔅 मोबाईल सोडून मैदानाकडे वळा! मराठी विज्ञान परिषदेच्या व्यासपीठावरून विद्यार्थ्यांचे आवाहन; वणीत वार्षिक सभा व बक्षीस वितरण संपन्न !

मोबाईल सोडून मैदानाकडे वळा ! मराठी विज्ञान परिषदेच्या व्यासपीठावरून विद्यार्थ्यांचे आवाहन;

वणीत वार्षिक सभा व बक्षीस वितरण संपन्न !

वणी (प्रतिनिधी) | ०५ मे २०२६ :

आजच्या डिजिटल युगात मुले मोबाईल स्क्रीनमध्ये हरवत चालली असताना, वणीतील विद्यार्थ्यांनी ‘मोबाईलपासून मैदानाकडे’ जाण्याचा महत्त्वपूर्ण संदेश दिला आहे. निमित्त होते, मराठी विज्ञान परिषद, वणी विभागाच्या वार्षिक सर्वसाधारण सभा आणि बक्षीस वितरण समारंभाचे. येथील श्रीमती नुसाबाई चोपणे विद्यालयात हा सोहळा अत्यंत उत्साहपूर्ण वातावरणात पार पडला.

विज्ञान परिषदेने केवळ पुस्तकी ज्ञान नव्हे, तर सामाजिक भान जपणारे उपक्रम राबवून वणी तालुक्यात विज्ञानाची गोडी निर्माण केली आहे, याचे प्रतिबिंब या सभेत उमटले.

🔬 विज्ञानाचा जागर: वर्षभराच्या उपक्रमांचा आढावा

कार्यक्रमाच्या अध्यक्षस्थानी मराठी विज्ञान परिषद वणी विभागाचे अध्यक्ष प्रा. महादेव खाडे होते. व्यासपीठावर कार्यवाह लक्ष्मण ईददे, कार्याध्यक्ष प्रशांत गोडे, कोषाध्यक्ष संजय देवाळकर आणि स्नेहलता चुंबळे यांची प्रमुख उपस्थिती होती.

सुरुवातीला, कार्यवाह लक्ष्मण ईददे यांनी वर्षभराचा अहवाल सादर केला. विज्ञान परिषदेने राबविलेले काही ठळक उपक्रम खालीलप्रमाणे आहेत:

• गणित दिन:महान गणितज्ञ श्रीनिवास रामानुजन यांचा परिचय व त्यांच्या कार्यावर विविध शाळांमध्ये विद्यार्थी आणि शिक्षकांसाठी मार्गदर्शन सत्रे आयोजित केली.

• गणेशोत्सव जनजागरण:गणेशोत्सवादरम्यान पत्रकांद्वारे आणि शाळांमध्ये प्रत्यक्ष जाऊन पर्यावरणपूरक उत्सवाबाबत उद्बोधन केले.

• प्रदूषण मुक्ती:दिवाळीत फटाक्यांमुळे होणारे प्रदूषण आणि होळी-रंगपंचमीच्या वेळी रासायनिक रंगांऐवजी नैसर्गिक रंगनिर्मितीबाबत शालेय व सामाजिक स्तरावर मोठी जनजागृती मोहीम राबविली.

🏆 गुणवंतांचा सन्मान: निबंध स्पर्धेचे विजेते घोषित

विद्यार्थ्यांच्या सुप्त गुणांना वाव देण्यासाठी विज्ञान परिषदेतर्फे २०२५-२६ या वर्षात विविध विषयांवर निबंध स्पर्धा आयोजित करण्यात आली होती. ‘खुला गट’ आणि ‘विद्यार्थी गट’ अशा दोन गटांत ही स्पर्धा पार पडली. विद्यार्थी गटासाठी ‘मोबाईलपासून मैदानाकडे’ हा अत्यंत समयोचित विषय देण्यात आला होता. या स्पर्धेतील विजेत्यांना मान्यवरांच्या हस्ते पारितोषिके देऊन सन्मानित करण्यात आले.

🎓 वणी विभागातील विजेते विद्यार्थी:

१. प्रथम क्रमांक:कु. आरोही प्रमोद ढेंगळे (शि.प्र.मं. विद्यालय, वणी)

२. द्वितीय क्रमांक:कु. श्वेता कैलास उईके

३. तृतीय क्रमांक:कु. सौंदर्या सुरेश कुळसंगे (आदर्श हायस्कूल, वणी)

■ उत्तेजनार्थ बक्षीसे:

• कु. संजना हेमंत मोहितकर (विठ्ठल पा. मांडवकर विद्यालय, तेजापूर)

• कु. नव्या शंकर खामनकर (राष्ट्रीय विद्यालय, राजूर कॉ.)

यावेळी मान्यवरांनी आपल्या मनोगतातून विजेत्यांचे कौतुक केले आणि विज्ञान परिषदेच्या कार्याची स्तुती केली.

🎶 असा रंगला सोहळा…

कार्यक्रमाची सुरुवात विजय गंधेवार यांनी सादर केलेल्या सुरेल विज्ञान गीताने झाली. कोषाध्यक्ष संजय देवाळकर यांनी प्रास्ताविकेतून कार्यक्रमाची रूपरेषा मांडली. कार्यक्रमेचे सुसूत्र संचालन आणि आभार प्रदर्शन मराठी विज्ञान परिषद वणीचे सहकार्यवाह भारत गारघाटे यांनी अत्यंत प्रभावीपणे केले.

🤝 यशासाठी सामूहिक प्रयत्न

हा कार्यक्रम यशस्वी करण्यासाठी श्रीमती नुसाबाई चोपणे विद्यालयाचे मुख्याध्यापक व शिक्षकेत्तर कर्मचारी, विनोद जेनेकर, प्रकाश गारघाटे, सुनील कोंगरे, डी.जे. गोहोकार, वैजनाथ खडसे, अश्विनी ढेंगळे, धुंडीबाल धानोरकर यांनी अहोरात्र परिश्रम घेतले.

बातमी आवडल्यास नक्की शेअर करा !