🧊 वणी नगरपरिषदेत स्वीकृत सदस्यांच्या नामनिर्देशनाची छाननी पूर्ण; भाजपकडून तीन, शिवसेना (उबाठा) कडून एक पात्र !

वणी नगरपरिषदेत स्वीकृत सदस्यांच्या नामनिर्देशनाची छाननी पूर्ण; भाजपकडून तीन, शिवसेना (उबाठा) कडून एक पात्र !

वणी (यवतमाळ) । १० जानेवारी २०२६:

वणी नगरपरिषदेत स्वीकृत सदस्यांच्या नियुक्तीसाठी सादर करण्यात आलेल्या नामनिर्देशन पत्रांची छाननी पूर्ण झाली आहे. यवतमाळ उपविभागीय अधिकारी तथा दंडाधिकारी यांनी तौलनिक संख्याबळाच्या आधारावर पात्र आणि अपात्र यादी जाहीर केली आहे. यानुसार भाजप कडून तीन, तर शिवसेना (उ.बा.ठा.) कडून एक नामनिर्देशन पत्र पात्र ठरले आहे. या छाननीचा अहवाल नगरपरिषदेला सादर करण्यात आला असून, आता सभेत अंतिम नियुक्त्या होणार आहेत.

महाराष्ट्र नगरपरिषदा, नगरपंचायती (नामनिर्देशित सदस्याची अर्हता व नियुक्त्या करण्याची पद्धत) नियम २०१० च्या तरतुदींनुसार ही छाननी करण्यात आली आहे. जिल्हाधिकाऱ्यांच्या आदेशानुसार उपविभागीय अधिकाऱ्यांनी पक्षांच्या संख्याबळानुसार नामनिर्देशन पत्र तपासले. नगरपरिषदेत एकूण तीन स्वीकृत सदस्य नेमण्यात येणार आहेत.

पक्षनिहाय पात्र आणि अपात्र नामनिर्देशन पत्रांची यादी अशी आहे:

• शिवसेना (उ.बा.ठा.): पक्षाकडे एक स्वीकृत सदस्याची जागा असून, शत्रुघ्न मारोती मालेकर यांचे नामनिर्देशन पत्र पात्र ठरले आहे.
• भारतीय जनता पक्ष (भाजप): पक्षाकडे दोन स्वीकृत सदस्यांच्या जागा असून, चार नामनिर्देशन पत्र सादर करण्यात आले होते. यापैकी किसनलाल छगनलाल खुनघर, रवींद्र सदाशिव बेलूरकर आणि अनिल मनोहरराव आक्केवार यांचे पत्र पात्र ठरले, तर अंकुश चिंतामन बोढे यांचे पत्र अपात्र ठरवण्यात आले.

भाजपकडून तीन पात्र उमेदवार असल्याने अंतिम दोन सदस्यांची निवड पक्षाचे गटनेते राकेश बुग्गेवार यांच्या नेतृत्वात होणाऱ्या बैठकीत होईल. पक्षश्रेष्ठींच्या आदेशानुसार ही निवड सोमवारी होण्याची शक्यता आहे. चर्चेनुसार खुनघर आणि बेलूरकर यांना प्राधान्य मिळू शकते.

तिसऱ्या स्वीकृत सदस्याच्या जागेसाठी इतर पक्षांची वाटचाल कठीण असल्याचे दिसते. महाविकास आघाडीतील घटक पक्षांना या जागेसाठी एकजुटीने प्रयत्न करावे लागतील. छाननी अहवालानुसार पात्र ठरलेल्या नामनिर्देशन पत्रांनुसारच सभेत नियुक्त्या कराव्यात, असे उपविभागीय अधिकाऱ्यांनी स्पष्ट केले आहे.या प्रक्रियेनंतर वणी नगरपरिषदेची कार्यकारिणी पूर्ण होईल आणि शहर विकासाच्या कामांना गती मिळेल, अशी अपेक्षा व्यक्त होत आहे. मात्र, स्वीकृत सदस्यांच्या निवडीत पक्षीय राजकारण कसे रंगेल, हे पाहणे औत्सुक्याचे ठरेल.

www.WaniSamachar.com