🔥 माजी आमदार विश्वासभाऊ नांदेकर यांचे शासकीय सन्मानाने अंत्यसंस्कार !

माजी आमदार विश्वासभाऊ नांदेकर यांचे शासकीय सन्मानाने अंत्यसंस्कार !

वणी । दि. २३ डिसेंबर २०२५ :

शिवसेनेचे ज्येष्ठ नेते आणि वणी विधानसभा मतदारसंघाचे माजी आमदार विश्वासभाऊ नांदेकर यांचे मुंबईतील लीलावती हॉस्पिटलमध्ये दि. २१ डिसेंबर २०२५ रोजी दुःखद निधन झाले. त्यांच्या निधनाने वणी व यवतमाळ जिल्ह्यातील राजकीय व सामाजिक वर्तुळात मोठी शोककळा पसरली आहे. आक्रामक नेते म्हणून ओळखले जाणारे नांदेकर यांचे पार्थिव दि. २३ डिसेंबर रोजी त्यांच्या मूळ गाव पाठरपूर येथे शासकीय सन्मानाने (राज्य स्तरावरील पूर्ण इतमामाने) अंत्यसंस्कार करण्यात आले.

मुंबईहून पार्थिव वणी येथे आणल्यानंतर हजारो नागरिकांनी त्यांचे अंतिम दर्शन घेतले. नंतर सजवलेल्या वाहनातून शेकडो वाहनांच्या शोभायात्रेसह पाठरपूर येथे नेण्यात आले. त्यांच्या स्वतःच्या शेतात पारंपरिक विधी पार पाडल्यानंतर मुखाग्नी त्यांच्या पुतण्याने दिली. अंत्ययात्रेदरम्यान वणी शहरातील तिलक चौक, गणेशपूर, पेटूर, कायर आदी ठिकाणी रस्त्याच्या दुतर्फा उभे राहून नागरिकांनी श्रद्धांजली वाहिली.

शासकीय सन्मानासह पार पडलेल्या या अंत्यसंस्काराला पालकमंत्री संजय राठोड, माजी केंद्रीय गृहराज्यमंत्री हंसराज अहीर, खासदार प्रतिभा धानोरकर, आमदार संजय देरकर, माजी आमदार संजीवरेड्डी बोदकुरवार, वामनराव कासवार, मनसे नेते राजू उंबरकर, शिवसेना (शिंदे गट) जिल्हा संघटक विजय चोरडिया यांच्यासह विविध पक्षांचे नेते, प्रशासकीय अधिकारी, कार्यकर्ते आणि मोठ्या संख्येने समर्थक उपस्थित होते. पोलिसांनी कडक बंदोबस्त ठेवला होता.

विश्वासभाऊ नांदेकर हे साधेपणा, सरळ स्वभाव आणि जनसंपर्कासाठी प्रसिद्ध होते. शिवसेना पक्षाच्या विचारसरणीचे ते अटल समर्थक होते. त्यांच्या कार्यकर्त्यांशी असलेल्या जवळीकतेमुळे ते जनतेच्या हृदयात घर करून होते. त्यांच्या जाण्याने वणी विधानसभा क्षेत्रात एक मोठी पोकळी निर्माण झाली असून, ती कधीही भरून न निघणारी असल्याचे मत अनेकांनी व्यक्त केले आहे.

त्यांच्या निधनाने वणी परिसरातील राजकारण व समाजकारणावर दीर्घकाळ प्रभाव पडणार असून, सर्व स्तरांतून त्यांना भावपूर्ण श्रद्धांजली वाहिली जात आहे

www.WaniSamachar.com