✔महाराष्ट्रात “जिल्हा परिषद” व “पंचायत समिती” निवडणुकीची घोषणा लवकरच; दोन टप्प्यात मतदानाची शक्यता !

✔महाराष्ट्रात “जिल्हा परिषद” व “पंचायत समिती” निवडणुकीची घोषणा लवकरच !

▪︎दोन टप्प्यात मतदानाची शक्यता !

महाराष्ट्र । ९ जानेवारी २०२६ :

महाराष्ट्रातील ग्रामीण स्थानिक स्वराज्य संस्थांच्या निवडणुकीकडे सर्वांचे लक्ष लागले आहे. राज्य निवडणूक आयोगाकडून जिल्हा परिषद आणि पंचायत समिती निवडणुकीच्या कार्यक्रमाची घोषणा येत्या आठवडाभरात होण्याची दाट शक्यता आहे. सर्वोच्च न्यायालयाच्या निर्देशानुसार या निवडणुका दोन टप्प्यात घेतल्या जाणार असून, आरक्षणाच्या ५० टक्के मर्यादेत राहणाऱ्या जिल्ह्यांमध्ये प्रथम टप्प्यात मतदान होईल.

राज्यात एकूण ३२ जिल्हा परिषद आणि ३३६ पंचायत समित्यांच्या निवडणुका प्रलंबित आहेत. यापैकी सुमारे १२ जिल्हा परिषदा (जसे पुणे, सातारा, सांगली, सोलापूर, कोल्हापूर, रायगड, रत्नागिरी, सिंधुदुर्ग, छत्रपती संभाजीनगर, परभणी, धाराशिव, लातूर आदी) आणि त्याअंतर्गत १२५ पंचायत समित्यांमध्ये आरक्षण ५० टक्क्यांपेक्षा कमी आहे. या भागातील निवडणुकीची घोषणा लवकरच अपेक्षित आहे. मतदान फेब्रुवारीच्या पहिल्या आठवड्यात (सुमारे ७ फेब्रुवारी) होण्याची शक्यता वर्तवली जात आहे.

उर्वरित २० जिल्हा परिषदा आणि ८८ पंचायत समित्यांमध्ये आरक्षणाची मर्यादा ५० टक्क्यांहून अधिक झाल्याने तेथील निवडणुका न्यायालयाच्या पुढील आदेशाच्या प्रतिक्षेत आहेत. सर्वोच्च न्यायालयात २१ जानेवारीला याबाबत सुनावणी होणार असून, त्या निर्णयानुसार दुसऱ्या टप्प्यातील निवडणुका घेतल्या जाणार आहेत.

सर्वोच्च न्यायालयाने ३१ जानेवारी २०२६ पर्यंत सर्व स्थानिक स्वराज्य संस्थांच्या निवडणुका पूर्ण करण्याचे निर्देश दिले आहेत. मात्र आरक्षण गुंतागुंतीमुळे हा मुदतवाढ मिळवण्यासाठी आयोग प्रयत्नशील आहे. राज्य निवडणूक आयोगाची महत्वाची बैठक होणार असून, त्यात अंतिम निर्णय घेतला जाईल.

महापालिका निवडणुकांच्या निकालानंतर (१६ जानेवारी) ग्रामीण भागातील राजकीय वातावरण अधिक तापण्याची शक्यता आहे. निवडणूक कार्यक्रम जाहीर होताच पक्षांची तयारी जोर धरेल.

(राज्य निवडणूक आयोग आणि न्यायालयीन घडामोडींवर आधारित)

www.WaniSamachar.com