🏛 वणी नगरपरिषदेत सत्तेची नवी वळणे: विद्याताई आत्राम यांचा पदग्रहणानंतर उपाध्यक्ष कोण? स्वीकृत सदस्यांची रस्सीखेच कशी?

🏛 वणी नगरपरिषदेत सत्तेची नवी वळणे: विद्याताई आत्राम यांचा पदग्रहणानंतर उपाध्यक्ष कोण? स्वीकृत सदस्यांची रस्सीखेच कशी?

वणी (यवतमाळ) । दि. ८ जानेवारी २०२६:

जवळपास चार वर्ष प्रशासकाच्या हातात राहिलेली वणी नगरपरिषदेची सूत्रे अखेर लोकप्रतिनिधींकडे परतणार आहेत. २०२५ च्या सार्वत्रिक निवडणुकीत भाजपने घवघवीत यश मिळवले असून, पक्षाच्या नवनिर्वाचित नगराध्यक्ष सौ. विद्याताई खेमराज आत्राम यांचा पदग्रहण सोहळा १२ जानेवारी रोजी होणार आहे. विशेष म्हणजे, वणी नगरपरिषदेच्या इतिहासात भाजपचा पहिल्या महिला नगराध्यक्ष म्हणून विद्याताई आत्राम विराजमान होणार आहेत. हा सोहळा शहरासाठी ऐतिहासिक ठरणार आहे.

● उपाध्यक्ष कोण ?

पदग्रहणानंतर लगेचच उपाध्यक्षपदाची निवडणूक होईल. भाजपकडे स्पष्ट बहुमत असल्याने ही निवडणूक बिनविरोध होण्याची दाट शक्यता आहे. मात्र, उपाध्यक्षपद कुणाला मिळेल, हे अद्याप गुलदस्त्यात आहे. अध्यक्षपदी महिला असल्याने उपाध्यक्षपदी पुरुष नगरसेवकाला संधी मिळण्याची चर्चा जोरात आहे. पक्षांतर्गत राकेश बुग्गेवार, लक्ष्मण उरकुडे, लवलेश लाल आणि अनिल चिंडालिया अशी काही नावे आघाडीवर आहेत. कोणाच्या गळ्यात ही जबाबदारीची माळ पडेल, याकडे सर्वांचे लक्ष लागले आहे.

● स्विकृत सदस्य 

उपाध्यक्ष निवडी नंतर स्वीकृत सदस्यांची प्रक्रिया सुरू होईल. भाजपच्या बहुमतानुसार दोन स्वीकृत सदस्य पक्षाकडून निश्चित मानले जात आहेत. मात्र तिसऱ्या स्वीकृत सदस्यासाठी महाविकास आघाडीत (मविआ) रस्सीखेच सुरू आहे. शिवसेना (उबाठा) आणि काँग्रेस या दोन्ही घटक पक्षांना हे पद हवे आहे. एकमेकांचा पाठिंबा न मिळाल्यास मविआला हे पद गमवावे लागू शकते. त्यामुळे आघाडीतील समन्वय कसा राहील आणि तिसरे पद कोणत्या पक्षाला मिळेल, हे पाहणे औत्सुक्याचे ठरेल.

वणीकरांच्या मनात आता तीन मोठे प्रश्न घोळत आहेत:

• उपाध्यक्षपद कुणाच्या खांद्यावर?
• भाजपचे दोन स्वीकृत सदस्य कोण?
• तिसरा स्वीकृत सदस्य शिवसेना (उबाठा) का काँग्रेस की “खेला होवे” ?

या सर्व घडामोडींवर वणी शहराचे लक्ष लागले असून, १२ जानेवारीनंतर नगरपरिषदेच्या नव्या नेतृत्वाची दिशा स्पष्ट होईल. शहर विकासाला नवे वळण देणाऱ्या या बदलांकडे सर्वांचे डोळे लागले आहेत.

(बातमी स्थानिक राजकीय घडामोडींवर आधारित)

www.WaniSamachar.com