वणीत मध्यरात्री शस्त्रधारी टोळीचा धाडसी दरोडा; ७६ वर्षीय ज्वेलर्स मालकावर चाकूने हल्ला, अंदाजे २० लाखांचा ऐवज लंपास !

वणीत मध्यरात्री शस्त्रधारी टोळीचा धाडसी दरोडा; ७६ वर्षीय ज्वेलर्स मालकावर चाकूने हल्ला,अंदाजे २० लाखांचा ऐवज लंपास

• गाडगेबाबा चौक परिसरात चार ते सहा दरोडेखोरांचा हल्ला,
• चौकीदार व पीडितला बांधून टाकले;
• पोलिसांचा तपास सुरू, शहरात भीतीचे वातावरण.

वणी । दि. ३० नोव्हेंबर २०२५ (प्रतिनिधी):

शहराच्या मध्यवर्ती भागातील गाडगेबाबा चौक परिसरात शनिवार रात्री मध्यरात्रीनंतर झालेल्या एका भयानक दरोड्याने संपूर्ण वणी शहर हादरले आहे.

चार ते सहा शस्त्रधारी दरोडेखोरांनी स्थानिक ज्वेलर्स मालक असलेल्या ७६ वर्षीय वृद्ध संजय निळकंठराव कोंडावार यांच्या घरी शिरून त्यांच्यावर चाकूने हल्ला करून लाखोंच्या रोख रकमेसह सोन्याचे दागिने लुटले. या घटनेमुळे शहरात भीती पसरली असून, पोलिसांनी तात्काळ तपास सुरू केला आहे. निवडणुकीच्या तोंडावर घडलेल्या या गुन्ह्याने स्थानिक नागरिकांमध्ये असुरक्षिततेची भावना निर्माण झाली आहे.

घटनेची माहिती अशी आहे की, संजय कोंडावार हे आपल्या ज्वेलर्स दुकानाच्या जवळील घरी एकटे राहतात. त्यांची पत्नी व अपत्यांचे निधन झाल्याने ते चौकीदाराच्या मदतीने घर सांभाळतात. शनिवार रात्री एक ते दीड वाजताच्या सुमारास दरोडेखोर टोळीने दुकानासमोर येऊन चौकीदार विलास वाडे (वय ४०) याला सुरीच्या धाकावर धरले आणि त्याला मालकाला जागवण्यास भाग पाडले. दार उघडताच टोळीने घरात शिरून कोंडावार यांच्या हातावर चाकूने वार करून त्यांना व चौकीदाराला दोरीने बांधले आणि तोंडात कपडे कोंबले. प्रतिकार केल्याने कोंडावार यांच्या हातावर गंभीर जखम झाली असून, त्यांना स्थानिक रुग्णालयात दाखल करण्यात आले आहे.

दरोडेखोरांनी घरातील लोखंडी अलमारी फोडली आणि त्यातील ४.५० लाख रुपयांची रोख रक्कम व सुमारे १०० ते १२० ग्रॅम सोन्याचे दागिने (गळ्यातील चेन, अंगठ्या व इतर मौल्यवान वस्तू) लुटले. एकूण लुटलेल्या मालमत्तेचे मूल्य १८ ते २० लाख रुपयांपर्यंत असावे, असे अंदाजे आहे. दागिन्यांमध्ये कोंडावार यांच्या अंगावरील सोन्याचा गोप व दोन अंगठ्यांचाही समावेश आहे. सुमारे १५ मिनिटांत हे धाडसी दुस्साह्य पार पाडून टोळीने पसार होण्यापूर्वी घरात कोणताही पुरावा न सोडता निघून गेली. कोंडावार व चौकीदार हे बांधलेल्या अवस्थेतून स्वतःच्या प्रयत्नाने मुक्त झाले आणि लगेच वणी पोलिसांना कळवले.

वणी पोलिस स्टेशनचे वरिष्ठ अधिकारी घटनास्थळी दाखल झाले असून, यवतमाळ येथून डॉग स्क्वाड व फिंगरप्रिंट तज्ज्ञांची टीम बोलावली आहे. परिसरातील सीसीटीव्ही फुटेज तपासले जात असून, साक्षीदारांच्या जबानी घेतल्या आहेत. पोलिसांनी गुन्हा दाखल केला असून, दरोडेखोरांचा शोध घेण्यासाठी विशेष पथक नेमले आहे. प्राथमिक तपासात दिसून आले की, टोळीने तोंडाला स्कार्फ बांधलेले असून, ते बुर्काधारी वेशात होते. शहरातील इतर दरोड्यांशी याचा संबंध असल्याचा संशय व्यक्त केला जात आहे. गेल्या वर्षी लालगुडा परिसरात अशाच प्रकारचा दरोडा घडला होता, तर प्रगतीनगर येथे प्रयत्न फसलेला होता, याचा उल्लेख करत पोलिसांनी सतर्कता बरतण्याचे आवाहन केले आहे.

या घटनेमुळे गाडगेबाबा चौक व आसपासच्या भागात दहशत माजली आहे. स्थानिक व्यापारी व रहिवाशांनी पोलिसांच्या नाईट पेट्रोलिंगची मागणी केली असून, शहरातील गुन्हेगारी रोखण्यासाठी अधिक कडक कारवाईची अपेक्षा व्यक्त केली आहे. कोंडावार यांच्या जखमांची गंभीरता लक्षात घेता त्यांच्यावर उपचार सुरू असून, ते सध्य स्थिर आहेत. पोलिसांनी नागरिकांना रात्री एकटे राहू नये आणि संशयास्पद हालचालींवर लक्ष ठेवण्याचे आवाहन केले आहे. या दरोड्याचा तपास वेगाने होत असून, लवकरच आरोपींना अटक करण्यात येईल, असा विश्वास पोलिस प्रशासनाने व्यक्त केला आहे. शहरवासीयांमध्ये सुरक्षेच्या बाबतीत चिंता वाढली असून, या प्रकरणाचा निकाल काय होईल, याकडे सर्वांचे लक्ष लागले आहे.

www.WaniSamachar.com