धडाका !
पिकविमा न मिळाल्यास विमा कंपनीची खैर नाही;

वणी (प्रतिनिधी) | ३० एप्रिल २०२६ :

निसर्गाच्या लहरीपणामुळे पिचलेल्या वणी तालुक्यातील शेतकऱ्यांची पिकविमा कंपनीकडून होणारी फसवणूक आता खपवून घेतली जाणार नाही. माजी जि.प. सदस्य विजय पिदुरकर यांनी आक्रमक पवित्रा घेत तहसीलदारांना निवेदन दिल्यानंतर, तहसीलदार वणी यांनी या प्रकरणाची गंभीर दखल घेतली आहे. संबंधित विमा कंपनीवर कारवाई करण्यासाठी आणि शेतकऱ्यांना न्याय मिळवून देण्यासाठी तालुका कृषी अधिकाऱ्यांना तातडीने बैठकीचे आयोजन करण्याचे आदेश देण्यात आले आहेत.

■ नेमके प्रकरण काय?

हंगाम २०२५-२६ मध्ये खरीप व रब्बी हंगामातील सोयाबीन, कापूस, तूर आणि ज्वारी या पिकांचा विमा वणी तालुक्यातील तब्बल १३,०७१ शेतकऱ्यांनी स्वतःचे पैसे भरून काढला होता. या शेतकऱ्यांनी एकूण १३,३७१ हेक्टर क्षेत्राचा विमा उतरवला होता. ऑगस्ट-सप्टेंबर २०२५ मध्ये झालेल्या अतिवृष्टी आणि महापुरामुळे पिकांचे अतोनात नुकसान झाले. शासनाच्या नियमानुसार जानेवारी २०२६ पर्यंत ही भरपाई मिळणे अपेक्षित होते. मात्र, तीन महिने उलटूनही ‘ॲग्रीकल्चर इन्शुरन्स कंपनी ऑफ इंडिया’ने अद्याप भरपाई दिलेली नाही.

■ विजय पिदुरकर यांचा आक्रमक पवित्रा

शेतकऱ्यांची ही अडचण पाहून माजी जिल्हा परिषद सदस्य विजय पिदुरकर यांनी दि. २९ एप्रिल २०२६ रोजी तहसीलदार तथा अध्यक्ष, तालुका पिक विमा तक्रार निवारण समिती यांना लेखी निवेदन दिले. त्यांनी आपल्या निवेदनात स्पष्ट केले की, शेतकरी सध्या मोठ्या आर्थिक अडचणीत असताना विमा कंपनीकडून झालेली ही दिरंगाई म्हणजे शेतकऱ्यांची क्रूर थट्टा आहे. कंपनीकडून शेतकऱ्यांची उघडपणे फसवणूक होत असून ही बाब अतिशय गंभीर आणि अन्यायकारक आहे.

■ तहसीलदारांचे ‘ॲक्शन मोड’ मध्ये आदेश

पिदुरकर यांच्या निवेदनाची तातडीने दखल घेत तहसीलदार वणी यांनी दि. २९ एप्रिल २०२६ रोजीच कार्यालयीन पत्र (क्र/म.सहा./संदर्भ/कावी/२३१/२०२६) निर्गमित केले. या पत्राद्वारे तालुका कृषी अधिकारी वणी यांना खालीलप्रमाणे कडक निर्देश दिले आहेत:

• बैठकीचे आयोजन: संबंधित विमा कंपनी, कृषी विभाग आणि शेतकरी यांची ७ दिवसांच्या आत संयुक्त बैठक आयोजित करावी.

• तात्काळ पत्रव्यवहार: नियमानुसार संबंधित यंत्रणेला तात्काळ पत्रव्यवहार करून या विषयाची माहिती द्यावी.

• अहवाल सादर करणे: केलेल्या संपूर्ण कार्यवाहीचा अहवाल तहसीलदार कार्यालयास तातडीने सादर करावा.

■ शेतकऱ्यांच्या आशा पल्लवित

पिदुरकर यांच्या पाठपुराव्यामुळे आणि प्रशासनाच्या तत्परतेमुळे वणी तालुक्यातील १३ हजार शेतकऱ्यांना आता विमा भरपाई मिळण्याच्या आशा पल्लवित झाल्या आहेत. जर ७ दिवसांत विमा कंपनीने सकारात्मक पावले उचलली नाहीत, तर शेतकरी संघटना पुढील काय आक्रमक भूमिका घेतात, याकडे संपूर्ण जिल्ह्याचे लक्ष लागले आहे.

■ थोडक्यात महत्वाचे :

विमा कंपन्या प्रीमियम गोळा करताना तत्परता दाखवतात, मात्र नुकसान भरपाई देण्याच्या वेळी नियमांचे आणि तांत्रिक कारणांचे अडथळे पुढे करतात. वणी तालुक्यातील १३ हजार शेतकऱ्यांचा हा प्रश्न केवळ प्रशासकीय नसून तो हजारो कुटुंबांच्या जगण्याशी संबंधित आहे. विजय पिदुरकर यांनी वेळीच उचललेले हे पाऊल कौतुकास्पद असून, आता कृषी विभागाने केवळ कागदी घोडे न नाचवता प्रत्यक्ष शेतकऱ्यांच्या खात्यात पैसे कसे जमा होतील, यासाठी विमा कंपनीवर दबाव निर्माण करणे काळाची गरज आहे. प्रशासनाचा हा ‘हस्तक्षेप’ शेतकऱ्यांना खऱ्या अर्थाने दिलासा देणारा ठरावा, हीच अपेक्षा.

आपले लेख, बातम्या व जाहिराती प्रसिद्ध करण्या करीता संपर्क करा, 9021203010.

---

वणी तालुक्यातील प्रत्येक घडामोडीचा अपडेट्स साठी आमच्याशी जोडून राहा:

www.WaniSamachar.com