💥  मोठी बातमी  💥

वणीचे सुपुत्र गजानन कासावार यांचा अमरावती विद्यापीठात ‘डंका’ !

आता प्रत्येक महाविद्यालयात रंगणार ‘विद्यार्थी साहित्य संमेलन’ !

वणी/अमरावती (प्रतिनिधी) | १८ एप्रिल२०२६ :

साहित्याची पंढरी असलेल्या विदर्भातील उगवत्या साहित्यिकांसाठी एक अत्यंत आनंदाची आणि अभिमानाची बातमी आहे. वणीचे सुपुत्र आणि संत गाडगे बाबा अमरावती विद्यापीठाचे राज्यपाल नामित अधिसभा सदस्य गजानन कासावार यांच्या ऐतिहासिक प्रस्तावामुळे आता विद्यापीठाशी संलग्न असलेल्या प्रत्येक महाविद्यालयात दरवर्षी ‘विद्यार्थी साहित्य संमेलन’ आयोजित केले जाणार आहे. या निर्णयामुळे हजारो महाविद्यालयीन कवी आणि लेखकांना हक्काचे व्यासपीठ मिळणार आहे.

■ गजानन कासावार यांच्या पाठपुराव्याला यश

विद्यार्थ्यांच्या अंगी असलेल्या सुप्त गुणांना वाव मिळावा, या उद्देशाने गजानन कासावार यांनी २९ सप्टेंबर २०२५ रोजी झालेल्या अधिसभेत (Senate) हा महत्त्वपूर्ण प्रस्ताव मांडला होता. या प्रस्तावावर विद्यापीठाने सकारात्मक मोहोर उमटवली असून, विद्यार्थी विकास विभागातर्फे तसे अधिकृत आदेशही निर्गमित करण्यात आले आहेत.

■ बातमीचे महत्त्वाचे मुद्दे:

• नव्या प्रतिभेला व्यासपीठ: पदवी आणि पदव्युत्तर स्तरावरील विद्यार्थ्यांमधील लेखन कौशल्य, सृजनशीलता आणि साहित्यिक जाण विकसित करण्यासाठी हे संमेलन मोलाचे ठरेल.

• प्रत्यक्ष अंमलबजावणी सुरू: विद्यापीठाच्या आदेशानुसार, अकोल्यातील श्रीमती राधादेवी गोयनका महाविद्यालय आणि बुलढाण्यातील विदर्भ महाविद्यालय येथे या वर्षापासून विद्यार्थी साहित्य संमेलनाची यशस्वी सुरुवात झाली आहे.

• राष्ट्रीय शैक्षणिक धोरणाशी सुसंगत: ‘NEP 2020′ नुसार मराठी भाषेला आणि स्थानिक साहित्याला प्रोत्साहन देण्याचे विद्यापीठाचे नैतिक कर्तव्य अधिसभेत मांडताना कासावार यांनी प्रभावी युक्तिवाद केला होता.

• प्रशासकीय साथ: कुलगुरू डॉ. मिलिंद बारहाते आणि विद्यार्थी विकास विभागाचे संचालक डॉ. राजीव बोरकर यांनी या विषयाचे गांभीर्य ओळखून हा उपक्रम तातडीने मार्गी लावला.

■ भविष्यातील साहित्याचा पाया!

विद्यार्थ्यांना त्यांच्या साहित्यकृती सादर करण्यासाठी आणि नव्या साहित्यिकांना प्रोत्साहन देण्यासाठी हा उपक्रम राज्यासाठी एक ‘रोल मॉडेल’ ठरणार आहे. विशेषतः ग्रामीण भागातील विद्यार्थ्यांच्या कविता, कथा आणि वैचारिक लेखनाला यामुळे मोठी उभारी मिळणार आहे.

“महाविद्यालयीन विद्यार्थी हा उद्याचा प्रगल्भ लेखक आहे. त्याच्या साहित्यिक प्रतिभेला व्यासपीठ मिळवून देणे, हे आपले कर्तव्य होते. या निर्णयामुळे अनेक नवे साहित्यिक राज्याला मिळतील, असा मला विश्वास आहे.”

— गजानन कासावार, अधिसभा सदस्य, अमरावती विद्यापीठ.

आपले लेख, बातम्या व जाहिराती प्रसिद्ध करण्या करीता संपर्क करा, 9021203010.

---

www.WaniSamachar.com