घरकुलच्या नावावर ग्राहकांना रेती पुरवठा; सावर्ला घाटावर प्रशासकीय दुर्लक्षामुळे मनमानी !

वणी (बंडू निंदेकर) । १५ मार्च२०२६ :.

वणी तालुक्यातील सावर्ला रेती घाटावरून घरकुल योजनेच्या लाभार्थ्यांना रेती पुरवठा करण्याचा निर्णय तालुका महसूल विभागाने घेतला आहे. मात्र, या निर्णयाचा दुरुपयोग काही वाहनचालक करत असल्याचे धक्कादायक चित्र समोर येत आहे.

मागील काही वर्षांपासून घरकुल धारकांना रेती मिळणे कठीण झाले होते. त्यांना जप्त केलेल्या रेती साठ्यातून रेती दिली जात होती, परंतु ही रेती अत्यंत अल्प प्रमाणात असल्याने अनेकांची घरकुले पूर्णत्वास जात नव्हती. या समस्येसाठी अनेक ग्रामपंचायतींचे सरपंच आणि राजकीय पक्षांनी निवेदने देऊन आंदोलने केली. अखेर प्रशासनाला जाग आली आणि त्यांनी घरकुल धारकांसाठी तालुक्यातील काही घाटांसह सावर्ला घाटातून रेती वितरण सुरू केले.

रेती वितरणाच्या उद्घाटनप्रसंगी काही महसूल अधिकारी उपस्थित होते, परंतु त्यानंतर ते या ठिकाणी फिरकलेच नाहीत. नेमक्या याच संधीचा फायदा घेऊन काही वाहनधारकांनी आणि त्या ठिकाणी वाटपासाठी असलेल्या कर्मचाऱ्यांनी संगनमत करून मनमानी सुरू केली आहे. सरळ-सरळ ‘चिरीमिरी’ (लाच) घेऊन वाहने सोडली जात असून, ही रेती थेट विक्री केली जात आहे.

महसूल विभागाच्या अधिकाऱ्यांना ही रेती घरकुल धारकांपर्यंत पोहोचत असल्याचे वाटत असले, तरी सत्य मात्र वेगळेच आहे. घरकुलच्या नावाने मिळणारी ही रेती खुल्या बाजारात विकली जात असल्याची गोपनीय माहिती मिळाली आहे. तरी प्रशासनाने या रेती वाहतूक करणाऱ्या प्रत्येक वाहनाची ‘टोकन तपासणी’ करावी, अशी मागणी आता जोर धरत आहे.

आपले लेख, बातमी व जाहिरात प्रसिद्ध करण्या करीता संपर्क करा, 9021203010.

---

WWW.WANISAMACHAR.COM