🛺 वणी-नांदेपेरा मार्गावर भीषण अपघात : भरधाव ट्रकची प्रवासी ऑटोला समोरासमोर धडक !

वणी-नांदेपेरा मार्गावर भीषण अपघात : भरधाव ट्रकची प्रवासी ऑटोला समोरासमोर धडक !

▪︎७ प्रवासी जखमी; दोघांची प्रकृती चिंताजनक !

वणी । ०६ जानेवारी, २०२६ :

वणी-नांदेपेरा मार्गावर वांजरी गावाजवळ दि.०६ जानेवारी,२०२६ रोज मंगळवारी सायंकाळी सुमारे ६.१५ वाजता एक भीषण रस्ता अपघात घडला. समोरून येणाऱ्या भरधाव ट्रकने (क्रमांक MH-३४ CQ-०९५६) प्रवासी ऑटोरिक्षाला जोरदार धडक दिली. या धडकेने ऑटोरिक्षाचा पूर्णपणे चेंदामेंदा झाला असून, त्यातील सात प्रवासी गंभीर जखमी झाले आहेत.

जखमी प्रवाशांमध्ये मजरा गावातील काही महिला, शालेय विद्यार्थी आणि विद्यार्थिनींचा समावेश आहे. अपघातातील दोन जखमींची प्रकृती अत्यंत चिंताजनक असल्याने त्यांना प्राथमिक उपचारा नंतर चंद्रपूर येथील रुग्णालयात हलवण्यात आले आहे. उर्वरित जखमींवर वणीतील ग्रामीण रुग्णालय तसेच शहरातील खासगी रुग्णालयांमध्ये उपचार सुरू आहेत.अपघाताची माहिती मिळताच स्थानिक नागरिकांनी तात्काळ मदत करीत जखमींना रुग्णालयात दाखल केले. वणी पोलीस ठाण्याचे कर्मचारी घटनास्थळी दाखल झाले असून, त्यांनी परिस्थिती नियंत्रणात आणली. ट्रकला ताब्यात घेऊन पोलिसांनी वाहतूक पूर्ववत केली. सध्या पोलीस या प्रकरणाचा अधिक तपास करीत आहेत.

या मार्गावर अपघातांच्या वाढत्या घटनांमुळे वाहनचालकांच्या वेगमर्यादेकडे आणि रस्ता सुरक्षेकडे अधिक लक्ष देण्याची गरज व्यक्त होत आहे.

www.WaniSamachar.com