📖 कवडशी गावकऱ्यांचा दणक्यात विजय: शिक्षकांच्या मागणीसाठी वज्रमूठ बांधून प्रशासनाला वाकवले !

कवडशी गावकऱ्यांचा दणक्यात विजय: शिक्षकांच्या मागणीसाठी वज्रमूठ बांधून प्रशासनाला वाकवले !

कवडशी । दि. ३० डिसेंबर २०२५:

“संघशक्ती युगे युगे” ही उक्ती खरी ठरविणारा अनोखा विजय कवडशी गावकऱ्यांनी मिळवला आहे. गावातील जिल्हा परिषद प्राथमिक शाळेत फक्त एकच शिक्षक शिल्लक राहिल्याने मुलांचे शिक्षण अंधारात ढकलले जाण्याच्या भीतीने संतापलेल्या गावकऱ्यांनी एकजूट दाखवली आणि पंचायत समितीवर जोरदार मोर्चा काढला. या संघर्षाचे यशस्वी नेतृत्व करणारे माजी जि.प. सदस्य विजय पिदुरकर यांच्या मार्गदर्शनाने गावकऱ्यांनी प्रशासनाला आपली मागणी मान्य करायला भाग पाडले. येत्या सोमवारी शाळेला नवीन शिक्षक देण्याचे लेखी आश्वासन प्रशासनाने दिले आहे.

कवडशी हे अवघड क्षेत्रातील गाव असूनही येथील जिल्हा परिषद शाळेत (इयत्ता १ ली ते ५ वी) केवळ एकच शिक्षक कार्यरत होता. प्रशासनाने दुसऱ्या एका शिक्षकाला प्रति-नियुक्ती (डिप्युटेशन) दिल्याने शाळेचा संपूर्ण भार एकट्याच्या खांद्यावर पडला होता. गरिबांच्या मुलांचेच प्रमाण जास्त असलेल्या या शाळेतील विद्यार्थ्यांचे भविष्य धोक्यात आले होते. गावकऱ्यांनी एक महिना आधीच याबाबत निवेदन दिले होते; मात्र प्रशासनाने दुर्लक्ष केल्याने संताप उसळला.

याच वेळी गावातील मुत्सद्दी, कसलेले आणि रणनीतीकार नेते विजय पिदुरकर यांनी पुढाकार घेतला. त्यांच्या नेतृत्वात शाळा व्यवस्थापन समिती, पालक, ग्रामपंचायत सदस्य आणि सर्व गावकऱ्यांनी वज्रमूठ बांधली. आज सकाळी पंचायत समितीवर मोर्चा काढून जोरदार निदर्शन केली. प्रशासनावर सतत दबाव ठेवल्याने अखेर त्यांना माघार घ्यावी लागली आणि नवीन शिक्षक नेमण्याचे आश्वासन द्यावे लागले.

हा विजय फक्त शिक्षक मिळण्यापुरता मर्यादित नसून, ग्रामीण भागातील शिक्षणाच्या हक्कासाठी उभी राहिलेल्या जनशक्तीचा दणक्यात विजय आहे. विजय पिदुरकर यांच्या नावातच विजय असल्याप्रमाणे त्यांनी गावकऱ्यांना एकत्र करून हा लढा यशस्वी करून दाखवला. गावकऱ्यांची ही एकजूट आणि त्यांचे संघटन कौशल्य प्रशंसनीय आहे.

मोर्चात शाळा व्यवस्थापन समितीचे अध्यक्ष नागोबा काकडे, उपाध्यक्ष संदीप इंगोले, सदस्य मनीषा बुच्चे, मयुरी टेकाम, अश्विनी मांढरे, माधुरी येटे, रेश्मा वासेकर, मीनल वासेकर यांच्यासह विवेक काकडे, अविनाश देवतळे, सुनील बुच्चे, शंकर भोसकर, हरिदास भेंडाळे, सुरेश भेडाळे, प्रशांत चिव्हाने, माधव गाताडे, सुरज भगत, संदीप भेंडाळे, रुपेश तुराणकर, दिलीप येसेकर, छाया चिडे, वंदना काकडे, संध्या ढुमणे, विद्या येटे, माधुरी टोंगे, नरेंद्र चिडे, सोनू बुच्चे, रमा भगत, प्रियंका भेंडाळे, सविता उरकुडे, करिष्मा तांदूळकर, धनराज तांदूळकर, शितल टोंगे, प्रवीण टोंगे, मंजुषा काकडे, अर्चना कोडापे, रूपाली इंगोले, मीरा भोसकर, पुष्पा बुचे आदींसह मोठ्या संख्येने गावकरी उपस्थित होते.

“ग्रामीण शिक्षणाच्या रक्षणासाठी गावकऱ्यांनी दिलेला हा लढा इतर गावांसाठी प्रेरणादायी ठरेल”, अशी प्रतिक्रिया विजय पिदुरकर यांनी व्यक्त केली. आता सोमवारी शिक्षक नेमणूक होईपर्यंत गावकरी सतर्क राहणार असल्याचे सांगितले जात आहे.

www.WaniSamachar.com