🙏 वणीचा नगर वाचनालयात साने गुरुजींच्या जयंतीनिमित्त श्रद्धांजली; बोदकुरवार व आत्राम यांच्या हस्ते माल्यार्पण !

वणीचा नगर वाचनालयात साने गुरुजींच्या जयंतीनिमित्त श्रद्धांजली; बोदकुरवार व आत्राम यांच्या हस्ते माल्यार्पण 

▪︎साने गुरुजींच्या आदर्शांवर चालण्याची गरज; सचिव कासावार यांचे मार्गदर्शनपूर्ण भाषण

वणी । २४ डिसेंबर :

थोर समाजसुधारक, साहित्यिक आणि स्वातंत्र्यसैनिक साने गुरुजी यांच्या जयंतीनिमित्त (२४ डिसेंबर) नगर वाचनालयाच्या प्रांगणात छोटेखानी पण श्रद्धापूर्ण कार्यक्रम आयोजित करण्यात आला. यावेळी वाचनालयाचे अध्यक्ष संजीवरेड्डी बोदकुरवार आणि नवनिर्वाचित नगराध्यक्ष विद्याताई खेमराज आत्राम यांच्या हस्ते साने गुरुजींच्या प्रतिमेचे माल्यार्पण करण्यात आले.

कार्यक्रमात वाचनालयाचे सचिव गजानन कासावार यांनी साने गुरुजींच्या जीवनकार्यावर प्रकाश टाकला. ते म्हणाले, “साने गुरुजींनी शिक्षण, समाजसुधारणा आणि राष्ट्रभक्तीच्या क्षेत्रात अमूल्य योगदान दिले. त्यांनी दाखवलेल्या प्रेम, समता आणि सत्याच्या मार्गावर चालणे आजच्या काळातही आवश्यक आहे. त्यांच्या ‘श्यामची आई’ सारख्या कृतींमधून मातृप्रेम आणि नैतिकतेचे धडे मिळतात.”

कार्यक्रमाचे सूत्रसंचालन विदर्भ साहित्य संघाचे सचिव अभिजित अणे यांनी तर आभार प्रदर्शन वाचनालयाचे संचालक हरिहर भागवत यांनी केले.

या प्रसंगी वाचनालयाचे उपाध्यक्ष विशाल झाडे, सचिन आत्राम, विदर्भ साहित्य संघाचे अशोक सोनटक्के, गजानन भगत, वैजनाथ खडसे, देवेंद्र भाजीपाले, प्रमोद लोणारे, राम मेंगावार यांसह इतर मान्यवर उपस्थित होते.

हा कार्यक्रम साने गुरुजींच्या आदर्शांना उजाळा देणारा ठरला असून, वाचनालयाच्या माध्यमातून असे उपक्रम आयोजित करून युवा पिढीला प्रेरणा देण्याचा मानस व्यक्त करण्यात आला.

www.WaniSamachar.com